ഒരു വ്യക്തിയുടെ പെരുമാറ്റം, ചിന്തിക്കുക, ഓര്‍മ്മിക്കുക, അനുമാനിക്കുക തുടങ്ങിയ ഗ്രഹണ/ധാരണാ സംബന്ധമായ പ്രവര്‍ത്തനങ്ങള്‍ എന്നിവയെ തകരാറിലാക്കുകയും അതിലൂടെ ഒരു വ്യക്തിയുടെ ദൈനംദിനം ജീവിതത്തേയും പ്രവര്‍ത്തികളേയും ബാധിക്കുകയും ചെയ്യുന്ന ഒരു അവസ്ഥ (സിന്‍ഡ്രം) യാണ് ഡിമെന്‍ഷ്യ. ഒരു വ്യക്തിയുടെ ദൈനംദിന പ്രവര്‍ത്തനത്തെ ബാധിക്കാന്‍ ആരംഭിക്കുന്ന ഘട്ടത്തില്‍ ഡിമെന്‍ഷ്യ വളരെ ചെറിയതോതിലായിരുന്നേക്കാം, എന്നാല്‍ പിന്നീടത് വ്യക്തി ദൈനംദിന ജീവിതത്തിലെ അടിസ്ഥാന കാര്യങ്ങള്‍ക്ക് പോലും മറ്റുള്ളവരെ പൂര്‍ണമായി ആശ്രയിക്കേണ്ടി വരുന്നത്ര ഗുരുതരാവസ്ഥയിലേക്ക് തിരിയുകയും ചെയ്യുന്നു.
പല അവസ്ഥകളും രോഗങ്ങളും ഡിമെന്‍ഷ്യയ്ക്ക് കാരണമാകാം. വയസായവരിലെ ഡിമെന്‍ഷ്യയ്ക്കുള്ള ഏറ്റവും പൊതുവായ കാരണം അല്‍ഷിമേഴ്സ് രോഗമാണ്. വാസ്കുലാര്‍ ഡിമെന്‍ഷ്യയ്ക്ക് കാരണമാകുന്നത് തലച്ചോറിലുണ്ടാകുന്ന തുടര്‍ച്ചയായ സ്ട്രോക്കുകളോ തലച്ചോറിലെ രക്ത വിതരണത്തിലെ മാറ്റങ്ങളോ ആണ്.
ഡിമെന്‍ഷ്യയ്ക്ക് കാരണമാകുന്ന മറ്റ് അവസ്ഥകളില്‍ താഴെ പറയുന്നവയും ഉള്‍പ്പെടുന്നു :
- മരുന്നുകളുടെ പാര്‍ശ്വഫലം.
- ദീര്‍ഘകാലമായുള്ള മദ്യപാനം.
- തലച്ചോറിലെ ട്യൂമറോ അണുബാധയോ.
- ന്യൂറോണുകള്‍ക്ക് വളരെയധികം തകരാറ് ഉണ്ടാക്കുന്നതിന് കാരണമാകുന്ന, ആഘാതം മൂലം തലച്ചോറിന് ഉണ്ടാകുന്ന പരിക്ക്.
- തലച്ചോറില്‍ രക്തം കട്ടപിടിക്കുന്നത്.
- വൈറ്റമിന് ബി 12 ന്‍റെ കുറവ്.
- തൈറോയ്ഡ്, കിഡ്നിയുടെ അല്ലെങ്കില്‍ കരളിന്‍റെ തകരാറ്.