തകരാറുകൾ

ഡിമെന്‍ഷ്യ (ബുദ്ധിഭ്രംശം)

വൈറ്റ് സ്വാൻ ഫൗണ്ടേഷൻ

Q

എന്താണ് ഡിമെന്‍ഷ്യ (ബുദ്ധിഭ്രംശം)

A

 
 
ഡിമെന്‍ഷ്യ ഒരു പ്രത്യേക തകരാറല്ല, മറിച്ച് ഒരു കൂട്ടം രോഗലക്ഷണങ്ങള്‍ ഒരേ കാലത്ത് പ്രവര്‍ത്തിക്കുന്ന ഒരു അവസ്ഥ (സിന്‍ഡ്രം)യാണ്.ഇതില്‍ തലച്ചോറിലെ വിവിധ കോശജാലങ്ങളും (ടിഷ്യു) കോശങ്ങളും തകരാറിലാകുന്നത് മൂലം ഉണ്ടാകുന്ന നിരവധി രോഗലക്ഷണങ്ങള്‍ ഉള്‍പ്പെടുന്നു. ഈ തകരാറ് മൂലം ആളുകള്‍ക്ക് അല്‍ഷിമേഴ്സ് അല്ലെങ്കില്‍ പാര്‍ക്കിന്‍സണ്‍സ് പോലെയുള്ള, കാലംചെല്ലുമ്പോള്‍ സ്ഥിതി കൂടുതല്‍ മോശമാകുന്ന രോഗങ്ങള്‍ ബാധിക്കുന്നു. ഓര്‍മ്മശക്തി നശിക്കല്‍, മാനസികാവസ്ഥയിലെ മാറ്റം, ചിന്തിക്കാനും യുക്തിവിചാരത്തിനും കണക്കു ചെയ്യാനും ഭാഷ പഠിക്കാനും ബുദ്ധിമുട്ട് തുടങ്ങിയവ ഇതിന്‍റെ ലക്ഷണങ്ങളില്‍ ചിലതാണ്. ഈ ലക്ഷണങ്ങളില്‍ പലതും  ദൈനംദിന പ്രവര്‍ത്തനങ്ങള്‍ ചെയ്യാനുള്ള വ്യക്തിയുടെ കഴിവിനെ തടസ്സപ്പെടുത്തുന്നു.
ഡിമെന്‍ഷ്യ ക്രമേണ വര്‍ദ്ധിക്കുന്ന അതായത്  അവസ്ഥ ക്രമേണ വഷളാകുന്ന രോഗമാണ്. വഴിയെ ഇത് വ്യക്തിയെ മരണത്തിലേക്ക് നയിക്കുകയും ചെയ്യുന്നു. 
 
ശ്രദ്ധിക്കുക : 'ഡിമെന്‍ഷ്യ ഇന്ത്യ റിപ്പോര്‍ട്ട്' പ്രകാരം നമ്മുടെ രാജ്യത്ത് 3.7 ദശലക്ഷത്തിലധികം പേര്‍ക്ക് ഡിമെന്‍ഷ്യ ബാധിച്ചിട്ടുണ്ട്. 2030 ആകുമ്പോഴേക്കും ഇത് ഇരട്ടിയാകുമെന്ന് പ്രതീക്ഷിക്കപ്പെടുന്നു.

Q

എന്താണ് ഡിമെന്‍ഷ്യ അല്ലാത്തത് ?

A

 
  •  പ്രായമാകുമ്പോള്‍ ആളുകള്‍ക്ക് ഓര്‍മ്മക്കുറവ് ഉണ്ടായേക്കാം.ശരീരികമായ രോഗങ്ങളും വിഷാദരോഗം പോലുള്ള മാനസിക രോഗങ്ങളും ഓര്‍മ്മശക്തിയെ ബാധിക്കാറുണ്ട്, ഇത് ഡിമെന്‍ഷ്യയുടെ ലക്ഷണമല്ല.
  •  ഡിമെന്‍ഷ്യയുള്ള വ്യക്തിക്ക് തലച്ചോറിന്‍റെ രണ്ട് പ്രവര്‍ത്തനങ്ങളിലെങ്കിലും പ്രശ്നം ഉണ്ടാകുകയും (ഓര്‍മ്മശക്തിക്ക്, തീരുമാനങ്ങളെടുക്കുന്നതില്‍ അല്ലെങ്കില്‍ ഭാഷയില്‍). ദൈനംദിന പ്രവര്‍ത്തനങ്ങള്‍ പരാശ്രയമില്ലാതെ ചെയ്യാന്‍  കഴിവില്ലാതാകുയും ചെയ്തേക്കാം.

Q

വിവിധ തരം ഡിമെന്‍ഷ്യകള്‍

A

 
ഡിമെന്‍ഷ്യ (ബുദ്ധിഭ്രംശം) പലതരത്തിലുണ്ട്. ഓരോന്നിനും അതിന് കാരണമാകുന്ന  രോഗത്തിന്‍റേയോ  അവസ്ഥയുടേയോ പേര് കൊടുത്തിരിക്കുന്നു.  
1. അല്‍ഷിമേഴ്സ് രോഗം ഏറ്റവും സാധാരണമായ ഒരു തരം ഡിമെന്‍ഷ്യയാണ്.അല്‍ഷിമേഴ്സ് രോഗം സാധാരണായി  7-10 വര്‍ഷം കൊണ്ട് സാവധാനം വര്‍ദ്ധിക്കുകയാണ് ചെയ്യുന്നത്. തലച്ചോറിന്‍റെ ഗ്രഹണ/ധാരണാ സംബന്ധമായ പ്രവര്‍ത്തനങ്ങള്‍ പതുക്കെ ക്ഷയിക്കുന്നു, ഒടുവില്‍ തലച്ചോറില്‍ ഓര്‍മ്മ, ഭാഷ, തീരുമാനമെടുക്കല്‍, സ്ഥലവും സമയവും തിരിച്ചറിയുന്നതിനുള്ള ശേഷി മുതലായവയെ നിയന്ത്രിക്കുന്ന ഭാഗങ്ങള്‍ പ്രവര്‍ത്തനം അവസാനിപ്പിക്കുന്നു. 
 
2.ല്യൂയി ബോഡി ഡിമെന്‍ഷ്യ : ല്യൂയി ബോഡി എന്നാല്‍,  തലച്ചോറില്‍ കാണപ്പെടുന്ന പ്രോട്ടീനുകളുടെ ഒരു അസാധാരണമായ കൂട്ടമാണ്. ഈ വിഭാഗത്തിലെ  ഡിമെന്‍ഷ്യയുള്ള വ്യക്തിക്ക് പലപ്പോഴും അതിവേഗം കണ്ണുകള്‍ ചലിക്കുന്ന ഒരവസ്ഥ, വ്യക്തി താന്‍ സ്വപ്നത്തില്‍ കാണുന്നത് അനുസരിച്ച് പ്രവര്‍ത്തിക്കുന്ന  ഉറക്കം സംബന്ധമായ തകരാര്‍ മുതലായവ ഉണ്ടായേക്കാം.
3. ഫ്രോന്‍റ്റോറ്റെംപെറല്‍ ഡിമെന്‍ഷ്യ :  ഈ തരം ഡിമെന്‍ഷ്യ മറ്റുതരങ്ങളുമായി തട്ടിച്ചുനോക്കുമ്പോള്‍ കുറച്ച് ചെറുപ്രായത്തിലാണ് സംഭവിക്കുന്നത് (40-65 വയസില്‍). തലച്ചോറില്‍  വ്യക്തിത്വം, പെരുമാറ്റം, ഭാഷ തുടങ്ങിയവയുമായി ബന്ധപ്പെട്ടുനില്‍ക്കുന്ന മേഖലകളിലെ (ഫ്രെന്‍റല്‍ലും റ്റെംപെറലും )  നാഡീകോശങ്ങള്‍ ക്രമേണ ക്ഷയിക്കുന്നതാണ് ഇതില്‍ നടക്കുന്നത്. ഇതിന്‍റെ ഫലമായി ഉചിതമല്ലാത്ത പെരുമാറ്റം, ഭാഷ, ചിന്തിക്കാനും ഏകാഗ്രതപുലര്‍ത്താനും ചലനങ്ങള്‍ക്കും പ്രശ്നങ്ങള്‍ മുതലായവ ഉണ്ടാകുന്നു.
 
4. ധമനീ സംബന്ധമായ ഡിമെന്‍ഷ്യ (ബുദ്ധിഭ്രംശം) : തലച്ചോറിലേക്ക് നീളുന്ന രക്തധമനികളിലൂടെയുള്ള രക്തപ്രവാഹം കുറയുകയോ തടസ്സപ്പെടുകയോ ചെയ്യുന്നതുമൂലം  തലച്ചോറിന് തകരാറുണ്ടാകുമ്പോഴാണ് ഈ ഡിമെന്‍ഷ്യ സംഭവിക്കുന്നത്. തലച്ചോറിലെ തകരാറ് മസ്തിഷ്കാഘാതം (സ്ട്രോക്ക്), ഹൃദയവാല്‍വിന് ഉണ്ടാകുന്ന അണുബാധ, അല്ലെങ്കില്‍ ധനമികളുടെ (രക്ത ധമനികളുടെ) അവസ്ഥകള്‍ മൂലം ഉണ്ടാകാവുന്നതാണ്.
 
.

Q

ഡിമെന്‍ഷ്യയുടെ ലക്ഷണങ്ങള്‍ എന്തെല്ലാം?

A

 
 
ഡിമെന്‍ഷ്യയുടെ ലക്ഷണങ്ങള്‍ അതിനുള്ള കാരണത്തിന്‍റേയും തലച്ചോറിലെ ഏതു ഭാഗത്തേയാണ് ഇത് ബാധിച്ചിരിക്കുന്നത് എന്നതിന്‍റേയും അടിസ്ഥാനത്തില്‍ വ്യത്യസ്തമായേക്കാം. ഓരോ വ്യക്തിക്കും വ്യത്യസ്തമായ ലക്ഷണങ്ങള്‍ അനുഭവപ്പെടുകയും ഈ ലക്ഷണങ്ങള്‍ മൂലമുള്ള ബുദ്ധിമുട്ടുകള്‍ ഓരോ വ്യക്തിയിലും വ്യത്യസ്തമായിരിക്കുകയും ചെയ്തേക്കാം.
 
ഡിമെന്‍ഷ്യയുള്ള വ്യക്തിക്ക് താഴെ പറയുന്ന കാര്യങ്ങളില്‍ ബുദ്ധിമുട്ട് അനുഭവപ്പെട്ടേക്കാം
 
  •  സമീപകാല സംഭവങ്ങള്‍ അല്ലെങ്കില്‍ പ്രവര്‍ത്തികള്‍ ഓര്‍ത്തെടുക്കുന്നതില്‍.
  •  കാര്യങ്ങള്‍ വര്‍ണിക്കാന്‍ ശരിയായ വാക്കുകള്‍ കണ്ടെത്താന്‍.
  •  ആളുകളെ തിരിച്ചറിയാനും സ്ഥലങ്ങള്‍ മനസിലാക്കാനും.
  • പാചകം, ശുചീകരണം പോലുള്ള ദൈനംദിന പ്രവര്‍ത്തികള്‍ ചെയ്യാന്‍.
  •  കാര്യങ്ങള്‍ ആസൂത്രണം ചെയ്യാനും ക്രമീകരിക്കാനും (സാമ്പത്തിക കാര്യങ്ങള്‍, ദിനചര്യകള്‍ മുതലായവ).
  •  യുക്തിസഹമായി ചിന്തിക്കുകയും പ്രതികരിക്കുകയും ചെയ്യല്‍, പ്രത്യേകിച്ച് ഒരു അടിയന്തിര ഘട്ടത്തില്‍.
  •  വ്യക്തിപരമായ കാര്യങ്ങള്‍ ചെയ്യല്‍ (കുളി, വൃത്തിയായി വസ്ത്രം ധരിക്കല്‍ മുതലായവ).
  •  അക്രമാസക്തിയിലേക്കും കലഹത്തിലേക്കും നയിച്ചേക്കാവുന്ന മനോഭാവത്തേയും പെരുമാറ്റത്തേയും നിയന്ത്രിക്കല്‍.
ചില തരത്തിലുള്ള ഡിമെന്‍ഷ്യ പ്രത്യേക തരത്തിലുള്ള ലക്ഷണങ്ങള്‍ക്ക് കാരണമായേക്കാം
  •  ല്യൂയി ബോഡി കൊണ്ടുള്ള ഡിമെന്‍ഷ്യ : ഇതുള്ള വ്യക്തിക്ക് മതിഭ്രമം ഉണ്ടാകുകയും (ഇല്ലാത്ത കാഴ്ചകള്‍ കാണുക) ഇടയ്ക്കിടെ വീഴുകയും ചെയ്തേക്കാം. 
  •  ഫ്രോന്‍റോറ്റെംപോറല്‍ ഡിമെന്‍ഷ്യ : വ്യക്തിത്വ മാറ്റം അല്ലെങ്കില്‍ അസാധാരണമായ പെരുമാറ്റം. ഈ വ്യക്തി സംസാരിക്കുമ്പോള്‍ മറ്റുള്ളവരോട് ഒരു പരിഗണനയും കാണിച്ചേക്കില്ല, പരുഷമായും മര്യാദയില്ലാതേയും പെരുമാറിയേക്കാം. 
  • വാസ്കുലാര്‍ ഡിമെന്‍ഷ്യ : ഈ വ്യക്തിക്ക് ഉന്മാദമോ പുതിയതോ അല്ലെങ്കില്‍ വഷളായിക്കൊണ്ടിരിക്കുന്നതോ ആയ ഒരു അസുഖം മൂലം  വിഭ്രാന്തിയോ ഉണ്ടായേക്കാം

Q

ഡിമെന്‍ഷ്യ എങ്ങനെ കണ്ടെത്താം?

A

 
ഡിമെന്‍ഷ്യ കണ്ടെത്താന്‍ ഒരു പ്രത്യേക ഒറ്റപ്പരിശോധന ഇല്ല. എന്നിരുന്നാലും ഡോക്ടര്‍മാര്‍ വ്യക്തിയുടെ രോഗ ചരിത്രം, പെരുമാറ്റത്തിലെ മാറ്റങ്ങള്‍, ലബോറട്ടറി പരിശോധനാ ഫലങ്ങള്‍ എന്നിവയുടെ അടിസ്ഥാനത്തില്‍ രോഗ നിര്‍ണയം നടത്തുന്നു. എത്രയും നേരത്തേ രോഗം കണ്ടെത്തുന്നത് ഈ വ്യക്തിയെ തന്‍റെ അവസ്ഥ മനസിലാക്കാനും, കുടുംബാംഗങ്ങളുടെ സഹായത്തോടെ ഭാവികാര്യങ്ങള്‍ക്കായി ഒരു പദ്ധതി തയ്യാറാക്കാനും സാധ്യമാകുന്നത്ര ദൈനംദിന കാര്യങ്ങള്‍ കൈകാര്യം ചെയ്യാനും സഹായിക്കും. 
 
ഡിമെന്‍ഷ്യ കണ്ടെത്തുന്നതിനുള്ള ചില പരിശോധനകള്‍ താഴെ പറയുന്നു : 
 
  • കോഗ്നിറ്റീവ്, ന്യൂറോഫിസിക്കല്‍ പരിശോധനകള്‍ : ധാരണാസംബന്ധമായ പ്രവര്‍ത്തനങ്ങള്‍ ഓര്‍മ്മ, ക്രമീകരണം, യുക്തിചിന്ത, വിധിന്യായം, ഭാഷ തുടങ്ങിയ കാര്യങ്ങളില്‍ നടത്തുന്ന പരിശോധനകളിലൂടെ വിലയിരുത്തുന്നു.
  • നാഡീസംബന്ധമായ വിലയിരുത്തല്‍ : ഡോക്ടര്‍മാര്‍ ചലനം, സംതുലനം, ബോധം, പ്രതിപ്രവര്‍ത്തനം മുതലായ കാര്യങ്ങള്‍ പരിശോധിക്കുന്നു.
  • ബ്രെയ്ന്‍ സ്കാന്‍ : ഈ വ്യക്തിക്ക് ഒരു ട്യൂമറുണ്ടാ എന്നറിയാന്‍  ഒരു സ്ട്രോക്ക് ഉണ്ടായിട്ടുണ്ടോ അല്ലെങ്കില്‍ ആന്തരിക രക്തസ്രാവം ഉണ്ടോ എന്ന് പരിശോധിക്കുന്നതിനായി ഒരു കംപ്യൂട്ടര്‍നിയന്ത്രിത റ്റോമോഗ്രോഫി (സി റ്റി) സ്കാന്‍ അല്ലെങ്കില്‍ മാഗ്നറ്റിക് റിസോണന്‍സ് ഇമേജിംഗ് ( എം ആര്‍ ഐ) സ്കാന്‍ നടത്തുന്നു.
  • മനഃശാസ്ത്രപരമായ വിലയിരുത്തല്‍ : ഒരു മാനസികാരോഗ്യ വിദഗ്ധന്‍ വിഷാദരോഗമോ അല്ലങ്കില്‍ മറ്റെന്തെങ്കിലും മാനസികാസ്വാസ്ഥ്യമോ ആണോ ഈ ലക്ഷണങ്ങള്‍ക്ക് കാരണം എന്ന് പരിശോധിച്ചേക്കാം.

Q

ഡിമെന്‍ഷ്യക്ക് ചികിത്സ നേടല്‍

A

 
ഡിമെന്‍ഷ്യ ചികിത്സിച്ച് ഭേദമാക്കാനാകില്ല, എന്തുകൊണ്ടെന്നാല്‍ ഡിമെന്‍ഷ്യക്ക് കാരണമാകുന്ന രോഗങ്ങള്‍ ക്രമേണ വര്‍ദ്ധിക്കുന്ന-അതായത് നാളുകള്‍ കഴിയുന്തോറും വഷളാകുന്ന  തരത്തിലുള്ളവയാണ്. എന്നിരുന്നാലും ഡോക്ടര്‍മാര്‍ക്ക് ഈ വ്യക്തിയെ അവന്‍റെ /അവളുടെ ലക്ഷണങ്ങള്‍ നിയന്ത്രിക്കാന്‍ സഹായിക്കാനാകും. ഡിമെന്‍ഷ്യയ്ക്ക് ഒപ്പം ഉണ്ടായേക്കാവുന്ന ഉത്കണ്ഠ, വിഷാദരോഗം തുടങ്ങിയ മറ്റ് അവസ്ഥകള്‍ക്ക് ചികിത്സ ആവശ്യമാണ്. 
ഡോക്ടര്‍മാരും കുടുംബാംഗങ്ങളും ഈ വ്യക്തിക്ക് ഇപ്പോഴും ചെയ്യാനാകുന്ന പ്രവര്‍ത്തനങ്ങളില്‍ ശ്രദ്ധവെയ്ക്കുകയും അവ ചെയ്യുന്നത് തുടരാന്‍ അവരെ പ്രോത്സാഹിപ്പിക്കുകയും ചെയ്യേണ്ടതാണ്.  ഏറ്റവും പ്രധാനപ്പെട്ട ചികിത്സ കുടുംബാംഗങ്ങളില്‍ നിന്നുള്ള സ്നേഹം, പിന്തുണ, ശ്രദ്ധ എന്നിവയാണ്.

Q

ഡിമെന്‍ഷ്യ തടയാനാകുമോ ?

A

 
ഡിമെന്‍ഷ്യ തടയാന്‍ ആകില്ല എന്നാണ് കണ്ടുവരുന്നതെങ്കിലും ചില കാര്യങ്ങള്‍ ഡിമെന്‍ഷ്യയുടെ ആക്രമണം വൈകിപ്പിക്കുന്നതിന് സഹായിച്ചേക്കും. എന്തായാലും ഈ വിഷയത്തില്‍ കൂടുതല്‍ ഗവേഷണങ്ങള്‍ നടക്കുകയാണ്. 
ആരോഗ്യകരമായ ഒരു ജീവിത ശൈലി പരിപാലിക്കുന്നതിന് ഗുണകരമായ ചില വഴികള്‍ താഴെ പറയുന്നു : 
  •  മാനസികമായി ഉത്തേജിപ്പിക്കുന്ന പ്രവര്‍ത്തനങ്ങളില്‍ മനസ് സജീവമാക്കി നിലനിര്‍ത്തുക. ഉദാഹരണത്തിന്, വാക്കുകള്‍ കൊണ്ടുള്ള കളി, സുഡോക്കു, ഓര്‍മ്മ പരിശീലനം, അല്ലെങ്കില്‍ പുതിയൊരു ഭാഷ പഠിക്കല്‍. 
  •  പതിവായി വ്യായാമം ചെയ്തും, ആരോഗ്യകരമായ ഒരു ഭക്ഷണക്രമം പരിപാലിച്ചും ശാരീരികമായി ഊര്‍ജ്സ്വലമായിരിക്കുക. 
  •  പൊതു സാമൂഹിക പ്രവര്‍ത്തനത്തില്‍ സന്നദ്ധസേവകനാകുക, ഏതെങ്കിലും ഒരു ഹോബി ക്ലാസില്‍ ചേരുക, സുഹൃത്തുക്കളോടൊപ്പമോ ഇഷ്ടമുള്ളവരോടൊപ്പമോ സമയം ചെലവഴിക്കുക എന്നിങ്ങനെ എപ്പോഴും ഊര്‍ജസ്വലമായിരിക്കുക.
  • ദൈനംദിന പ്രവര്‍ത്തനങ്ങള്‍ക്കായി ഒരു അച്ചടക്കമുള്ള ദിനചര്യ വളര്‍ത്തിയെടുക്കുക.
  •  പുകവലിയും മദ്യപാനവും ഉപേക്ഷിക്കുക.

Q

ഡിമെന്‍ഷ്യയുള്ള ഒരാളെ പരിചരിക്കല്‍

A

 
ഒരു വ്യക്തിക്ക് ഡിമെന്‍ഷ്യയാണെന്ന് കണ്ടെത്തപ്പെട്ടാല്‍ അത് ആ വ്യക്തിക്കും കുടുംബാംഗങ്ങള്‍ക്കും തീവ്രദുഃവും ഞെട്ടലും ഉണ്ടാക്കിയേക്കും. ഡിമെന്‍ഷ്യയുള്ള വ്യക്തികള്‍ക്ക് പ്രാംരഭ ഘട്ടത്തില്‍ വലിയ അളവില്‍ പിന്തുണയും സമാശ്വാസവും ആവശ്യമുണ്ട്. അതിലൂടെ ജീവിതം ആ വ്യക്തികള്‍ക്ക് കൂടുതല്‍ എളുപ്പവും കൈകാര്യം ചെയ്യാനാകുന്നതും ആക്കി മാറ്റാനാകും. 
 ഈ വ്യക്തിയുടെ പരിചരണം ഏറ്റെടുക്കാന്‍ ശേഷി നേടുന്നതിന് താഴെ പറയുന്ന ചില നിര്‍ദ്ദേശങ്ങള്‍ നിങ്ങള്‍ക്ക് പിന്തുടരാവുന്നതാണ്. എന്നിരുന്നാലും ഈ വ്യക്തിയുടെ അവസ്ഥയ്ക്കും സാഹചര്യത്തിനും അനുഗുണമായി നിങ്ങള്‍ക്ക് ഈ നിര്‍ദ്ദേശങ്ങളില്‍ ചെറിയ മാറ്റങ്ങള്‍ വരുത്താവുന്നതാണ്. 
ഡിമെന്‍ഷ്യ ക്രമേണ വര്‍ദ്ധിക്കുന്ന രോഗമാണെന്നതും ഇതിന്‍റെ ലക്ഷണങ്ങള്‍ ദിവസങ്ങള്‍ പിന്നിടുന്തോറും വഷളായി വരുമെന്നതും നിങ്ങള്‍ മനസിലാക്കേണ്ടതാണ്. 
  •  ആശയവിനിമയം : ഡിമെന്‍ഷ്യയുള്ള വ്യക്തിയുമായി സംസാരിക്കുമ്പോള്‍ കണ്ണുകളുമായി ബന്ധം പുലര്‍ത്താന്‍ ശ്രദ്ധിക്കുക. ലളിതമായ വാചകങ്ങളില്‍ സാവധാനത്തിലും സ്പഷ്ടമായും സംസാരിക്കുക. അതുപോലെ തന്നെ ഒരു സമയം ഒരു വിഷയത്തെക്കുറിച്ചു  മാത്രം പറയാനും ശ്രദ്ധിക്കുക.
  • വ്യായാമം : ഈ വ്യക്തിയെ ലളിതമായ വ്യായാമങ്ങള്‍ ചെയ്യാനും, ശരീര സൗഖ്യം നിലനിര്‍ത്താനും വിഷാദത്തിന്‍റെ ലക്ഷണങ്ങള്‍ കുറയ്ക്കാനും ഇരിക്കാനും നടക്കാനും കൈകള്‍ ചലിപ്പിക്കാനും മറ്റുമുള്ള മോട്ടോര്‍ സ്കില്‍സ് നിലനിര്‍ത്താനും   പ്രോത്സാഹിപ്പിക്കണം. 
  •  കളികളും മറ്റ് പ്രവര്‍ത്തനങ്ങളും : ചിന്ത ഉപയോഗിച്ചുള്ള പ്രവര്‍ത്തനങ്ങളിലും കളികളിലും പങ്കെടുക്കാന്‍ ഈ വ്യക്തിയെ പ്രോത്സാഹിപ്പിക്കുക. തിരിച്ചറിയല്‍ സംബന്ധിച്ച വൈദഗ്ധ്യം ഉപയോഗിക്കുന്നത് തലച്ചോറിലെ കോശങ്ങള്‍ ക്ഷയിക്കുന്നത് സാവധാനത്തിലാക്കാന്‍ സഹായിച്ചേക്കും. 
  • ദിനചര്യ : ദൈനംദിന പ്രവര്‍ത്തനങ്ങള്‍ക്ക് ഒരു ശരിയായ ദിനചര്യ ഉണ്ടാക്കുക, അങ്ങനെയാകുമ്പോള്‍ ഈ വ്യക്തിക്ക് ഭക്ഷണം കഴിക്കുന്നസമയവും  ഉറങ്ങാന്‍ പോകുന്ന സമയവും തോന്നിയ പടിയാകുന്നതു കൊണ്ടുള്ള ശല്യം ഉണ്ടാകില്ല. പെരുമാറ്റത്തില്‍ വരുന്ന മാറ്റങ്ങളെ സ്വീകരിക്കാന്‍ തയ്യാറാകുക, കാരണം കുറച്ചു നാള്‍ കഴിയുമ്പോള്‍ ഈ വ്യക്തിയുടെ സ്വഭാവത്തില്‍ വലിയ മാറ്റം ഉണ്ടായേക്കാം. 
  •  ഭാവി : ഡിമെന്‍ഷ്യയുടെ പ്രാരംഭ ഘട്ടത്തില്‍ ഈ വ്യക്തിയെ ഭാവി ആസൂത്രണം ചെയ്യാനും സാമ്പത്തികം, വസ്തു, ദീര്‍ഘകാല സംരക്ഷണ പദ്ധതി, സുരക്ഷ, ദൈനംദിന ജീവിതം തുടങ്ങിയ കാര്യങ്ങളില്‍ തീരുമാനമെടുക്കാനും പ്രോത്സാഹിപ്പിക്കുക.

Q

പരിചരിക്കുന്നവര്‍ക്കുള്ള പരിചരണം

A

 
ഡിമെന്‍ഷ്യയുള്ള ഒരാളെ പരിചരിക്കുക എന്നത് വളരെ മാനസിക സമ്മര്‍ദ്ദവും നിരാശയും ശാരീരികവും  വൈകാരികവുമായ തളര്‍ച്ചയും സൃഷ്ടിക്കുന്ന കാര്യമാണ്. നിങ്ങള്‍ക്ക് പലപ്പോഴും ദേഷ്യം, കുറ്റബോധം, ദുഃഖം, സ്വയം പരിതാപം, ഉത്കണ്ഠ, നിസ്സഹായത തുടങ്ങിയവയുടെ ഒരു സമ്മിശ്ര വികാരം ഉണ്ടായേക്കാം. പക്ഷെ ഈ ദുഷ്കരമായ ഘട്ടത്തിലൂടെ തുഴഞ്ഞു മുന്നേറുന്നതിനുള്ള കരുത്ത് നേടാന്‍ നിങ്ങള്‍ നിങ്ങളുടെ ശാരീരികവും മാനസികവുമായ സൗഖ്യത്തില്‍ ശ്രദ്ധവെയ്ക്കേണ്ടതാണ്.
  •  ഈ രോഗത്തെക്കുറിച്ച് നിങ്ങള്‍ക്ക് കഴിയാവുന്നത്ര പഠിക്കുക, അതിലൂടെ നിങ്ങള്‍ക്ക് രോഗിയുടെ പ്രശ്നങ്ങള്‍ നന്നായി  മനസിലാക്കാനും സാഹചര്യം നല്ല രീതിയില്‍ കൈകാര്യം ചെയ്യാനും സാധിക്കും. 
  •  ഡോക്ടറോടും കൗണ്‍സിലറോടും  നിങ്ങളുടെ ഉത്കണ്ഠകള്‍ ചര്‍ച്ച ചെയ്യുക.
  •  ആവശ്യമുള്ളപ്പോള്‍ സുഹൃത്തുക്കളുടേയും കുടുംബാംഗങ്ങളുടേയും സഹായം തേടുക.
  • നിങ്ങളുടെ ശാരീരികവും വൈകാരികവും ആത്മീയവുമായ ആരോഗ്യത്തില്‍ ശ്രദ്ധവെയ്ക്കുക.
  •  കുറച്ചു നേരം പുറത്തു പോകുകയും നിങ്ങള്‍ക്ക് ഇഷ്ടമുള്ള കാര്യങ്ങള്‍ ചെയ്യുകയും വേണം.
  • നിങ്ങളുടെ അനുഭവങ്ങള്‍ പങ്കുവെയ്ക്കുന്നതിനും നിങ്ങളുടെ അതേ പ്രശ്നങ്ങള്‍ തന്നെ നേരിടുകയും  പരിചരണം കൊടുക്കുകയും ചെയ്യുന്ന മറ്റുള്ളവരില്‍ നിന്നും പിന്തുണ തേടുന്നതിനുമായി ഒരു സഹായക സംഘത്തില്‍ ചേരുക.  അവിടെ അവര്‍ക്ക് പിന്തുണ കൊടുക്കാന്‍ നിങ്ങള്‍ക്ക് സാധിക്കുകയും ചെയ്യും. 

White Swan Foundation
malayalam.whiteswanfoundation.org